تصالح طرفي واقعة التحرش بسيدتين في موقف هايبر وان بالشيخ زايد، أمام جهات التحقيق، وإخلاء سبيل الشاب المتهم.

تداول رواد مواقع التواصل الاجتماعي، مقطع فيديو تم تداوله لتعدي فتاتين وشاب، بالضرب واستخدام ألفاظ خارجة وإيحاءات غير لائقة، على شاب آخر بموقف هايبر وان، حيث اتهمت الفتاتان الشاب بالتحرش بهما، إلا أن عددا كبيرا من المواطنين الذين كانوا موجودين في الموقف أكدوا حسب ما ظهر في الفيديو المتداول على أحدى المواقع، أن الشاب لم يقترب منهما ولم يرتكب أي فعل تجاههما.

وروى الشاب تفاصيل التعدي عليه بالضرب، حيث قال: أنا كنت واقف في دوري بطابور الموقف في أمان الله ولا عملت أي حاجة، العربية وصلت وكنت بركب زي باقي الناس، وأنا بركب لقيت واحدة ست دخلت وسط زحمة الرجالة وقالت ان أنا اتهجمت عليها، وأنا أصلا مكنتش مركز معاها وكنت بركب العربية وفي إيدي شنط، وأنا بركب لقيت اللي بيشدني من ضهري، وكنت واقف في دوري.

وتابع الشاب صاحب واقعة التحرش بهايبر وان: اتبلت عليا والراجل اللي معاها شدني، أنا لا كنت بيا ولا عليا وكنت راجع من الشغل ومطبق ومش مستوعب اللي حصل معايا، أنا لا اتحرشت بها ولا جيت جنبها، وبدأت تغلط فيا هي والراجل اللي معاها، واتهجموا عليا بالضرب، وحصلتلي إصابات، البت رفعت عليا الشبشب، والناس اللي واقفة في الموقف شاهدة على اللي حصل وكذا حد قال إني معملتش حاجة والناس كلها دافعت عني.