تحدث الإعلامي أحمد شوبير، في برنامجه الإذاعي: مع شوبير، المذاع عبر إذاعة أون سبورت اف ام، صباح اليوم الثلاثاء الموافق 24 من مارس الجاري، عن بعض أخبار تخص الفريق الأول لكرة القدم بالنادي الأهلي.

رحيل كامويش

وقال شوبير، «كامويش مهاجم الأهلي مشي واللي اتعمل في عقده عيب قوي، ولجنة التعاقدات مشيت واسامة هلال واحد من الضحايا، يجب على النادي الأهلي إيقاف الخلاف داخل المجلس ومش سر أن في خلاف جوة المجلس».

وأضاف: «ياسين منصور مش ساحر  هيضرب الأرض يطلع بطولات وهو شغال على الموسم الجديد، فمحدش يزعل لو حصل حاجة تاني دلوقتي».

أين أبناء النادي؟

وتساءل: «عايز اسأل الناس اللي شغالة جوة النادي: أبناء النادي دول ملهمش لازمة زي رأفت خليل اللي بيجيب جول في كل ماتش مع زد.. وفي واحد زي كباكا.. طيب اقولك على معلومة توروب مكانش عايز يمشي محمد عبدالله وعمر كمال عبد الواحد».

وتابع: «حد يقولي كدة نفسية أحمد عيد عاملة ازاى؟ واترد علي لما اتكلمت انت ليه تيجي من المصري وأنت أساسي هناك وفي منتخب مصر.. هو الأسيوطي اللي الكل كان فرحان بيه راح فين، اختفي وبعد كدة اتصاب».

وأكد شوبير: «أى لعيب هيجيله عقد مهم كان اسمه تخين أو سمين هيمشي، والاتجاه داخل النادي الأهلي ما دام العرض مناسب يمشي».

موعد مباراة الأهلي المقبلة

يواجه الفريق الأول لكرة القدم بالنادي الأهلي مضيفه سيراميكا كليوباترا، على استاد القاهرة، في تمام الثامنة مساء يوم الجمعة الموافق 3 من إبريل المقبل، ضمن منافسات الجولة الأولى من المرحلة النهائية ببطولة الدوري المصري الممتاز موسم 2025/ 2026.